Sahibkarlar güzəştli kreditlər aldı
İqtisadiyyat Nazirliyinin Sahibkarlığa Kömək Milli Fondu mayın 25-i paytaxtın Sabunçu rayonunun Bakıxanov qəsəbəsində işgüzar forum keçirib. Rəsmi məlumata görə, fondun icraçı direktoru Şirzad Abdullayev forumda bildirib ki, 2017-ci ildə ölkə üzrə 360 sahibkarlıq subyektinin investisiya layihəsinə 36,2 milyon manat güzəştli kredit yönəldilib: “Bu layihələrin reallaşdırılması 1000-dən çox yeni iş yerinin yaradılmasına imkan verir. Ümumilikdə isə indiyədək paytaxt qəsəbələrində sahibkarlıq subyektlərinin 1345 investisiya layihəsinin maliyyələşdirilməsinə 377,6 milyon manat güzəştli kredit verilib”.
İşgüzar forumda Bakı qəsəbələrində fəaliyyət göstərən sahibkarlar 9,8 milyon manat güzəştli kredit alıb. Kreditlər əsasən tikinti materiallarının, mətbəx və məişət mallarının istehsalı, istixana kompleksinin yaradılması, quşçuluq və heyvandarlıq sahələrinin inkişafına yönəldiləcək, bu hesaba 200-dən çox yeni iş yerinin açılması mümkün olacaq.
