Diabet xəstələrinin sayı 17 min 575 nəfər artıb
Bir ildə Azərbaycanda diabet xəstələrinin sayı 17 min 575 nəfər artıb. Mayın 25-i Respublika Klinik Xəstəxanasında Dünya Qalxanabənzər Vəzi Gününə həsr olunmuş tədbirdə belə deyilib.
AZƏRTAC xəbər verir ki, tədbirdə danışan Respublika Endokrinoloji Mərkəzin (REM) direktor müavini Babək Salek 2016-2020-ci illər üçün şəkərli diabet üzrə dövlət proqramı çərçivəsində qalxanabənzər vəzi xəstəliyindən əziyyət çəkən insanların müayinə və müalicəsi məqsədi ilə davamlı addımlar atıldığını qeyd edib. Bildirilib ki, hazırda ölkə əhalisinə 60-dan çox endokrinoloji kabinə xidmət göstərir, ölkənin şəhər və rayonlarında müayinə, məsləhət və profilaktika işləri aparılır.
Tədbirdə qeyd olunub ki, 2016-cı ilin sonuna REM-də şəkərli diabet xəstəliyi ilə 226 min 952 nəfər qeydiyyatda olub. 2015-ci ildə analoji göstərici 209 min 377 nəfər təşkil edib.
