28-ci qalib: “Mançester Yunayted”
İngiltərənin “Mançester Yunayted” komandası UEFA Avropa Liqasında 2016-2017 mövsümünün qalibi olub. Mayın 24-ü İsveçin paytaxtı Stokholmda, “Frends Arena” stadionunda keçirilən finalda ingilislər Hollandiyanın “Ayaks” komandasına üstün gəliblər – 2:0.
Novator.az bildirir ki, “Mançester Yunayted” 1971-ci ildən keçirilən, 2009-cu ilədək UEFA kuboku adlanmış turniri zəfərlə başa vuran 28-ci komandadır. Mayın 24-dək 27 komandanın belə uğuru vardı.
“Ayaks” 1 dəfə UEFA kubokuna sahib çıxıb. İngiltərənin “Çelsi”, “İpsviç”, Almaniyanın “Şalke”, “Bavariya”, “Bayer”, “Ayntraxt” (Frankfurt), Rusiyanın “Zenit”, SSKA, Ukraynanın “Şaxtyor”, İspaniyanın “Valensiya”, Türkiyənin “Qalatasaray”, İtaliyanın “Napoli”, Belçikanın “Anderlext”, Hollandiyanın PSV komandaları da 1 yol uğur əldə ediblər.
Digər qaliblər bunlardır: “Sevilya” (İspaniya) – 5 dəfə, “İnter” (İtaliya), “Yuventus” (İtaliya), “Liverpul” (İngiltərə) – 3 dəfə, “Atletiko” (İspaniya), “Portu” (Portuqaliya), “Parma” (İtaliya), “Real” (İspaniya), “Borussiya” (Mönhenqladbah, Almaniya), “Feyenoord” (Hollandiya), “Tottenhem” (İngiltərə), “Höteborq” (İsveç) – 2 dəfə.
