Yeni tariflər qüvvəyə minib
Tarif (qiymət) Şurasının 23 may iclasında Dövlət İmtahan Mərkəzinin apardığı dövlət qulluğunda ödənişli xidmətlərin tariflərinin tənzimlənməsi məsələsinə baxılıb və müvafiq qərar qəbul edilib. Dövlət qulluğu ilə bağlı ödənişli xidmətlərin tarifləri 7 qrup üzrə 10-110 manat arasında müəyyən edilib.
Novator.az bildirir ki, iclasda həmçinin dərman vasitələrinin qiymətlərinin tənzimlənməsi prosesinin davamı olaraq yeni qeydiyyatdan keçmiş 200-ə yaxın dərman vasitəsinin qiymətləri təsdiqlənib. Bununla da topdan və pərakəndə satış qiymətləri və qüvvəyə minmə tarixi təsdiq edilən dərman vasitələrinin sayı 10361-ə çatıb.
Azərbaycanda dövlət tənzimlənməsi tətbiq edilən qiymətlərin (tariflərin), xidmət haqlarının, yığımların dövlət tənzimlənməsi kollegial icra hakimiyyəti orqanı olan Tarif (qiymət) Şurasının səlahiyyətindədir. Şuraya iqtisadiyyat naziri sədrlik edir. Onun üzvləri maliyyə; vergilər; ədliyyə; energetika; nəqliyyat, rabitə və yüksək texnologiyalar; kənd təsərrüfat; səhiyyə; təhsil; əmək və əhalinin sosial müdafiəsi nazirlərinin müavinləri, Dövlət Gömrük və Dövlət Şəhərsalma və Arxitektura komitələri sədrlərinin müavinləridir.
