Ramazan ayı başlayır: fətva verildi
Qafqaz Müsəlmanları İdarəsinin Qazılar Şurası və Elmi-Dini Şurası Ramazan ayının başlanması münasibətilə fətva verib.
Novator.az-ın məlumatına görə, fətvada bildirilir ki, Şamaxı Astrofizika Rəsədxanasının bu ilki hesablamalarına əsasən, ölkəmizdə Ramazan ayının 1-i Ayın görünməsi ilə miladi təqvimlə 27 may 2017-ci ilə təsadüf edəcək. Ayın göründüyü andan Ramazan ayı başlanacaq.
Qafqaz Müsəlmanları İdarəsi Şamaxı Astrofizika Rəsədxanası ilə birlikdə Azərbaycan ərazisi üfüqünə uyğun olaraq Ramazan ayının əvvəli, namaz vaxtları, ayın gündəlik duaları, eləcə də bayram tarixini müəyyənləşdirən xüsusi təqvim tərtib edib.
Fətvada vurğulanır ki, digər mənbələrdən daxil olmuş, təxribat və təfriqə xarakterli, məzhəb və vaxt ayrı-seçkiliyinə səbəb ola biləcək təqvimlərin din xadimləri və dindarlar tərəfindən istifadəsi yolverilməzdir.
Ramazan bayramı Ayın ərazimizdə görünməsindən asılı olaraq iyunun 26-na təsadüf edəcək.
Fitrə zəkatının vaxtı Ramazan ayının son günüdür. Qazılar Şurasının qənaətinə görə, bugünkü günə uyğun olaraq adambaşına 5-10 manat arası fitrə zəkatının verilməsi məsləhət görülür.
