Sabiq prezident məhkəmə qarşısında
Mayın 23-ü Cənubi Koreyanın paytaxtı Seulda 65 yaşlı sabiq prezident Pak Kın Henin cinayət işi üzrə məhkəmə başlayıb. Novator.az-ın məlumatına görə, sabiq prezidentə ümumilikdə 14 ittiham irəli sürülüb. Ona ömürlük həbs cəzası verilə bilər. Məhkəmənin 6 ay çəkə biləcəyi qeyd olunur.
Pak Kın He 2012-ci ildə prezident seçilmişdi. O, ölkənin ilk qadın prezidenti idi.
Ötən il dekabrın 9-da Cənubi Koreya parlamenti prezidentin istefasına səs verib. Pak Kın He rəfiqəsi Çoy Sun Sili hökumət işlərinə qarışdırmaqda günahlandırılıb. Hazırda həbsdə olan Çoy Sun Silə korrupsiya, vəzifə səlahiyyətlərindən sui-istifadə ittihamları irəli sürülüb.
Bu il martın 10-da Cənubi Koreyanın Konstitusiya Məhkəməsi prezident Pak Kın Henin istefaya göndərilməsi barədə qərarı təsdiqləyib.
Martın 31-də Pak Kın He tutulub. Onun “Samsunq” şirkətindən külli miqdarda rüşvət alınmasına bağlı olduğu, vəzifə səlahiyyətlərindən sui-istifadə edərək gizli informasiyanı üçüncü şəxsə ötürdüyü bildirilir. Bütövlükdə bu iş üzrə 30-dan çox şəxs ittiham olunur.
Mayın 9-da Cənubi Koreyaya yeni prezident seçilib. Bu postu Demokrat Partiyasının lideri Mun Çje İn tutub.
