Nazirlik müharibə iştirakçılarının siyahısını açıqlamır
Mayın 4-də Novator.az saytı Əmək və Əhalinin Sosial Müdafiəsi Nazirliyinə sorğu ilə müraciət edib.
Müraciətdə sayt ölkədə sağ qalan 1941-45-ci illər müharibə iştirakçılarının siyahısını istəyib.
Sorğuda qeyd olunub ki, Əmək və Əhalinin Sosial Müdafiəsi Nazirliyi 1941-1945-ci illər müharibəsi iştirakçıları olan 763 nəfərin hər birinə prezident İlham Əliyevin 24 aprel 2017-ci il sərəncamı əsasında 1000 manat məbləğində birdəfəlik maddi yardım ödədiyini bəyan edib.
Novator.az mayın 9-da qeyd olunan Faşizm Üzərində Qələbə Günü ərəfəsində 1941-1945-ci illər müharibəsi iştirakçıları olan 763 nəfərin siyahısını dərc etmək qərarına gəlib və ünvanlandığı sorğuda xahiş edilib ki, həmin siyahı redaksiyaya təqdim edilsin.
Sorğu göndərilən gün Əmək və Əhalinin Sosial Müdafiəsi Nazirliyinin ictimaiyyətlə əlaqələr şöbəsinin müdiri Elman Babayev Novator.az-a bildirib ki, sorğuya baxılıb cavab veriləcək. Bundan sonra dəfələrlə əlaqə yaratmağa cəhd edilsə də, mümkün olmayıb.
Mayın 22-də nazirliyə elektron poçt vasitəsi ilə yenidən müraciət edilib, sorğuya cavab istənib. Novator.az-ın sorğusuna və zənglərinə bu günə qədər heç bir cavab verilməyib.
“İnformasiya əldə etmək haqqında” qanuna görə, informasiya sorğusu 7 iş günündən gec olmayaraq icra edilməlidir.
