Bir ildə 31,1 milyon nəfər qaçqın düşüb
2016-cı ildə 31,1 milyon adam hərbi münaqişə və təbii fəlakət üzündən öz evini tərk etmək məcburiyyətində qalıb. Novator.az-ın məlumatına görə, Norveç Qaçqınlar Şurasının yeni hesabatında belə deyilir.
Mayın 22-də yayılan hesabata əsasən, hərbi münaqişədən qaçanların siyahısına Konqo Demokratik Respublikası başçılıq edir: ötən il bu ölkəni hərbi münaqişəyə görə 922 minə yaxın insan tərk edib.
Siyahıda ikinci yerdə Suriya (824 min adam qaçqın düşüb), üçüncü yerdə İraq (659 min adam) dayanır.
İlk beşlikdə sonrakı yerlərdə Əfqanıstan (653 min adam) və Yəmən (478 min adam) qərarlaşıb.
Hərbi münaqişələrə görə evlərini tərk edən 6,9 milyon insanın 2,6 milyonu Saxaranın cənubundakı Afrika ölkələrinin payına düşür.
Təşkilatın hesabatına əsasən, təbii fəlakətlərə görə ev-eşiyini tərk edənlərin sayı hərbi münaqişə üzündən qaçqın düşənlərin sayından üç dəfə çoxdur.
Ötən il iqlim təhlükəsinə məruz qalan 24 milyon insanın çox hissəsi yaşadıqları məkanı tərk edib. Təbii fəlakət üzündən qaçqın düşənlərin sayına görə birinci yerdə Çin (7,4 milyon adam), ikinci yerdə Filippin (5,9 milyon adam), sonrakı yerlərdə Hindistan (2,4 milyon nəfər) və İndoneziya (1,2 milyon) qərarlaşıb.
Səidə Hüseynova
