Valyuta satışı 36,7 faiz azalıb
Mərkəzi Bank mayın 18-də 2017-ci ilin ilk rübü üzrə pul siyasəti icmalını açıqlayıb. İcmalda bildirilir ki, hesabat dövründə valyuta bazarının ümumi həcmi ötən ilin müvafiq dövrü ilə müqayisədə əhəmiyyətli azalıb: “Üç ayda ötən ilin ilk rübü ilə müqayisədə ABŞ dolları ilə valyuta əməliyyatlarının həcmi 33,5 faiz azalıb, avro ilə əməliyyatların həcmi isə 5,7 faiz artıb. Rüb ərzində valyuta bazarında əməliyyatların 82,2 faizi ABŞ dollarında, 17,8 faizi digər valyutalarda aparılıb.
Valyuta bazarının həcminin azalması nağd xarici valyuta bazarı seqmentində də müşahidə edilib. Banklar ötən ilin ilk rübü ilə (147 milyon ABŞ dolları) müqayisədə nağd valyutanın xalis satışını (cari ilin ilk rübündə 77 milyon ABŞ dolları) 2 dəfə azaldıb”.
Mərkəzi Bank bildirir ki, 2017-ci ilin ilk rübündə Dövlət Neft Fondu ilə birlikdə 24 valyuta hərracı keçirib: “Rüb ərzində fondun xarici valyuta satışları 793,1 milyon ABŞ dolları təşkil edib, bu da ötən ilin müvafiq dövrü ilə müqayisədə 36,7 faiz azdır”.
İcmalda qeyd olunur ki, 2016-cı ilin sonuna ABŞ dollarının məzənnəsi 1,7707 manat səviyyəsində olmuşdu, 2017-ci il fevralın 1-nə özünün dövr üzrə maksimum həddinə – 1,92 manata qalxıb, martın 27-nə isə minimum həddinə – 1,72 manata enib: “Rübün sonuna manata nəzərən ABŞ dolları 2,6 faiz ucuzlaşıb. Rüb ərzində 1 ABŞ dollarının manata qarşı orta günlük məzənnəsi isə 1,7848 manat təşkil edib. Manatın qeyri-neft sektoru üzrə ümumi ticarət çəkili real effektiv məzənnəsi 3,6 faiz artıb”.
