Ermənistanda hökumət dəyişir
Ermənistan prezidenti Serj Sərkisyan mayın 18-də hökumətin istefasını qəbul edib. Novator.az bildirir ki, istefa yeni parlamentin bu gün fəaliyyətə başlaması ilə bağlıdır.
Yeni hökuməti aprelin 2-də seçilmiş 105 nəfərlik parlamentdə 58 mandatı olan hakim Respublika Partiyası quracaq. Ötən həftə Respublika Partiyası hökumət ortağı Daşnaksütunla yeni koalisiya razılaşması imzalayıb. Daşnaksütun Partiyasının 7 mandatı var.
2015-ci ilin dekabr ayında qəbul edilmiş yeni konstitusiya ilə Ermənistan mərhələ-mərhələ parlament respublikası idarə üsuluna keçir. Ana qanuna görə, hökuməti proporsional sistemlə seçilən parlamentdə mandatların yarıdan çoxuna sahib partiya qurur. 2018-ci ildə Serj Sərkisyanın prezident səlahiyyətləri başa çatandan sonra icra hakimiyyəti və dövlət idarəçiliyi sisteminə ümumi rəhbərliyi hökumət həyata keçirəcək. Yalnız dövlət başçısı funksiyası daşıyan prezidenti isə parlament seçəcək.
