15 günün ekoloji pozuntuları
Ekologiya və Təbii Sərvətlər Nazirliyi qanunvericiliyin tələblərinə riayət olunmasını araşdırıb. Rəsmi məlumatda bildirilir ki, mayın 1-dən 15-nə qədər atmosfer havasının, su və torpaq ehtiyatlarının, yerin təkinin, fauna və floranın mühafizəsi, o cümlədən ətraf mühitə məişət və istehsalat tullantılarının yerləşdirilməsi sahəsində qanun pozuntularına görə 128 akt və protokol tərtib olunub, nöqsanların aradan qaldırılması üçün 22 müddətli məcburi göstəriş verilib.
28 iş üzrə 25 min 545,6 manat inzibati cərimə tətbiq edilib, ətraf mühitə dəymiş ziyana görə 23 iş üzrə 19 min 647,46 manat məbləğində iddia qaldırılıb, ətraf mühitə tullantıların atılmasına və axıdılmasına görə 191 iş üzrə 36 min 936,46 manat məbləğində ödəmə tətbiq edilib.
Tədbir görülməsi üçün hüquq mühafizə orqanlarına 20, icra qurumlarına 15, məhkəmələrə isə 4 iş göndərilib.
