Dövlət qulluğuna qəbul: sınaq müddəti azaldı
Prezident İlham Əliyev fərman imzalayaraq sınaq müddəti ilə dövlət qulluğuna qəbul müqaviləsinin nümunəsində dəyişiklik edib. Novator.az-ın məlumatına görə, yenilik sınaq müddəti ilə əmək müqaviləsinin müddətini 6 aydan 3 aya endirir.
Dəyişiklik “Dövlət qulluğu haqqında” qanunda yeniliklərin tətbiqindən irəli gəlir. 31 may 2016-cı ildə edilmiş yeniliklərə əsasən, dövlət qulluğuna qəbul müsabiqə əsasında aparılır. Müsabiqə test imtahanından və müsahibədən ibarətdir. Müsabiqədən müvəffəqiyyətlə keçmiş namizədlər vakant dövlət qulluğu vəzifəsinə təyin edilmək üçün 5 iş günü müddətində dövlət orqanının rəhbərinə təqdim olunurlar. Dövlət orqanının rəhbəri təqdim olunmuş namizədlərdən birini seçərək altı ay müddətinə stajçı kimi qulluğa qəbul etməli və vakant dövlət qulluğu vəzifəsinə təyin etməlidir.
Staj dövründə dövlət orqanı rəhbərinin təyin etdiyi kurator stajçının işini istiqamətləndirir, fəaliyyətinə nəzarət edir və staj müddəti qurtardıqdan sonra stajçının sınaq müddəti ilə dövlət qulluğuna qəbul edilməsinin məqsədəuyğun olub-olmadığı barədə tövsiyə təqdim edir. Tövsiyə müsbət olarsa, stajçı əmək müqaviləsi bağlamaq yolu ilə üç ay sınaq müddəti ilə dövlət qulluğuna qəbul edilir.
