Rayonlarda çəyirtkələrlə mübarizə gedir
Azərbaycan hökuməti ölkədə Mərakeş və İtaliya çəyirtkələrinə qarşı müşahidə və mübarizə tədbirləri həyata keçirir.
Novator.az xəbər verir ki, bununla bağlı Kənd Təsərrüfatı Nazirliyi açıqlama yayıb. Bildirilir ki, İmişli, Saatlı, Sabirabad, Biləsuvar və Salyan rayonlarında 35 min hektar dövlət ehtiyat fondu torpaqlarında müşahidə işləri aparılıb, 8 min 500 hektar sahədə isə sirayətlənmə aşkar edilib. Hazırda ümumilikdə 7 min 640 hektar dövlət ehtiyat fondu torpaqlarında mübarizə tədbirləri görülür. Laçın rayonundan olan məcburi köçkünlərin məskunlaşdığı Beyləqan rayonunun Şirinqum ərazisindəki dövlət ehtiyat fond torpaqlarında həmin zərərvericilərə qarşı 875 hektar sahədə mübarizə işləri başa çatıb.
Hacıqabul, Şamaxı və Kürdəmir rayonlarında 760 hektar, Tovuz, Qazax, Ağstafa rayonlarında və Ceyrançöl düzündə 3 min 600 hektar sahədə çəyirtkələrin məhvi davam edir. Mübarizə tədbirləri “Pikap” tipli, ultra kiçik həcmli müasir və yüksək manevr qabiliyyəti olan “AU 8115 M” çiləyici aqreqatlar və yerüstü çiləyicilər vasitəsilə həyata keçirilir.
Nazirlik bildirir ki, əkin sahələrinin ən başlıca problemlərindən biri çəyirtkələrlə bağlıdır. Bu ziyanvericilər taxıl məhsullarını, meyvə-tərəvəzi, pambığı, hətta meyvə ağaclarının yarpaqlarını məhv edir. Onlar sürətlə çoxalır, bir ərazidən digər əraziyə sürətlə miqrasiya edir və digər həşəratlardan fərqli olaraq daha çox qidalanır.
Çəyirtkələr sutka ərzində sürü ilə 30 kilometrdən, tək uçduqda isə 250 kilometrdən çox məsafəni qət edə bilir. Bir sahədə bitkiləri məhv etdikdən sonra dərhal digər sahəyə, rayona, hətta qonşu ölkə ərazisinə asanlıqla keçə bilir.
