Qafqaz Müsəlmanları İdarəsinə yeni səlahiyyət verilir
Mayın 16-da Milli Məclis “Dini etiqad azadlığı haqqında” qanuna dəyişiklik edib. Yeniliyə əsasən, Qafqaz Müsəlmanları İdarəsi xaricdə dini təhsil almış Azərbaycan vətəndaşlarına islam dininə aid ayin və mərasimlər aparmaq icazəsi verə bilər. Bu icazə Dini Qurumlarla İş üzrə Dövlət Komitəsi ilə razılaşdırılmalıdır.
Qafqaz Müsəlmanları İdarəsinin dəvət etdiyi din xadimləri istisna olmaqla əcnəbilər və vətəndaşlığı olmayan şəxslərin dini təbliğat aparması qadağandır. Vətəndaşların təhsil almaq üçün xarici ölkələrin dini tədris müəssisələrinə göndərilməsini, dini tədris müəssisələri tələbələrinin və müəllimlərinin, habelə din xadimlərinin və mütəxəssislərinin mübadiləsini Dini Qurumlarla İş üzrə Dövlət Komitəsi ilə razılaşdırmaqla Qafqaz Müsəlmanları İdarəsi həyata keçirir.
