Parlament kabel televiziyası qanununa səs verdi
Mayın 16-da Milli Məclis “Kabel şəbəkəsi yayımı haqqında” qanunu birinci oxunuşda qəbul edib. Novator.az-ın məlumatına görə, 17 maddəlik qanun kabel televiziyası şəbəkəsi yayımının hüquqi, iqtisadi və təşkilati əsaslarını müəyyənləşdirir.
Layihəyə əsasən, Azərbaycan ərazisində kabel şəbəkəsi ölkədə daimi yaşayan Azərbaycan vətəndaşlarının və (və ya) nizamnamə kapitalı Azərbaycanda daimi yaşayan Azərbaycan vətəndaşlarına məxsus olan hüquqi şəxslərin, bələdiyyənin mülkiyyətində ola bilər.
Kabel şəbəkəsi yayımı lisenziya əsasında həyata keçirilir. Yayımçı teleradio proqramlarının hər hansı kabel şəbəkəsi üzrə yayımını lisenziyada göstərilən ərazidə həyata keçirir.
Xarici ölkələrin teleradio yayımçısı Azərbaycanda fəaliyyət göstərən yayımçının proqram paketində yayımlanmaq üçün müvafiq icra hakimiyyəti orqanının yaratdığı qurumdan icazə almalıdır.
