Nikah müayinəsinə dair yeni statistika
Mayın 16-da rəsmi məlumat yayan Səhiyyə Nazirliyi bildirir ki, 2015-ci il iyunun 1-dən indiyə qədər nikaha daxil olmaq istəyən 268 min 174 nəfər icbari tibbi müayinədən keçib. Bu ilin aprel ayı ərzində isə 9 min 653 şəxs belə müayinə üçün müraciət edib.
2015-ci il iyunun 1-dən nikaha daxil olmaq istəyən şəxslər müvafiq orqana təqdim etdikləri ərizəyə tibbi müayinədən keçdiklərini təsdiq edən arayış da əlavə etməlidir. Bu arayışın təqdim olunmaması nikahın bağlanmasına mane olan hallar sırasına daxil edilib. Nikaha daxil olan şəxslərdən biri özündə zöhrəvi xəstəliyin və immun çatışmazlığı virusunun törətdiyi xəstəliyin olmasını o biri tərəfdən gizlətdikdə digər tərəf nikahın etibarsız sayılması tələbi ilə məhkəməyə müraciət edə bilər.
Rəsmi hesabata görə, ötən ay müayinədən keçən 301 nəfərdə talassemiya daşıyıcılığı, 40 nəfərdə sifilis, 7 nəfərdə isə QİÇS aşkar olunub.
Tibbi müayinə və məsləhətlər Səhiyyə Nazirliyinin müəyyən etdiyi dövlət və bələdiyyə tibb müəssisəsində pulsuz həyata keçirilir.
