Ekologiya və təbii sərvətlər naziri vətəndaşların şikayətlərini dinləyib
Mayın 16-da ekologiya və təbii sərvətlər naziri Hüseyn Bağırov Qusar şəhərində yerləşən Heydər Əliyev Mərkəzində Siyəzən, Şabran, Quba, Qusar, Xaçmaz və Xızı rayonlarında yaşayan vətəndaşları qəbul edib.
Ekologiya və Təbii Sərvətlər Nazirliyinin yaydığı məlumata görə, görüşdə ətraf mühitin mühafizəsi, meşələrin qorunması, biomüxtəliflik, hidrometeorologiya, ətraf mühitin monitorinqi və başqa məsələlərlə bağlı 40-dan çox vətəndaşın şikayət və təklifi dinlənilib, müraciətlərinə baxılıb.
Nazir qəbula yazılmış vətəndaşların müraciət, şikayət və təkliflərini dinləyərək onların aradan qaldırılması, müraciətlərin operativ şəkildə araşdırılması, qaldırılan məsələlərin qanunvericiliyə uyğun həlli istiqamətində nazirliyin müvafiq qurumlarının rəhbərlərinə tapşırıqlar verib.
Görüş zamanı müraciətlərin bir hissəsi yerindəcə həllini tapıb, nazirliyin fəaliyyət dairəsinə aid olmayan müraciətlər isə müvafiq qurumlara çatdırılmaq üçün qeydiyyata alınıb.
