Yerevan meri postunu qorudu
Yerevan Şəhər Şurasına mayın 14-də keçirilmiş seçkinin nəticələri açıqlanıb. Novator.az-ın məlumatına görə, hakim Respublika Partiyası səslərin 71,25%-ni alaraq qalib gəlib. “Çıxış” bloku 21%, Əriklər Ölkəsi Partiyası 7,75% səs alıb.
Proporsional üsulla seçilən 65 nəfərlik Şəhər Şurasında mandatların yarıdan çoxunu əldə edən siyasi qüvvənin siyahısındakı ilk şəxs Yerevan meri olur. Beləliklə, Respublika Partiyasının siyahısına başçılıq edən Yerevanın indiki meri Taron Marqaryan postunu əlində saxlayıb.
1978-ci ildə anadan olan Taron Marqaryan Ermənistan Kənd Təsərrüfatı Akademiyasını bitirib. İqtisad elmləri namizədidir. Nazirlər Kabinetinə daxil olan müxtəlif qurumlarda çalışıb, Yerevanın Avan icmasının sədri olub. 2009-cu ildən Yerevan Şəhər Şurasının üzvü, 2011-ci ildən Yerevan meridir. Respublika Partiyasına 1996-cı ildə qoşulub.
Yerevan Şəhər Şurası 4 ildən bir seçilir.
