Sərmayədə 3,5 faiz azalma qeydə alınıb
Dörd aylıq sərmayə hesabatı açıqlanıb. Novator.az-ın məlumatına görə, Dövlət Statistika Komitəsi bildirir ki, yanvar-aprel aylarında ölkənin iqtisadi və sosial sahələrinin inkişafı üçün əsas kapitala 4 milyard 533,4 milyon manat vəsait yönəlib. Bu, 2016-cı ilin müvafiq dövrü ilə müqayisədə 3,5 faiz azdır.
Vəsaitin 2 milyard 982 milyon manatı neft sektoruna, 1 milyard 551,4 milyon manatı qeyri-neft sektoruna yönəlib, ümumi sərmayənin 72,7 faizi bilavasitə tikinti-quraşdırma işlərinə sərf edilib. İstifadə olunan vəsaitin 83,9 faizi məhsul istehsalı obyektlərinin, 11,2 faizi xidmət sahələri üzrə obyektlərin, 4,9 faizi isə ümumi sahəsi 506,5 min kvadratmetr olan yaşayış evlərinin payına düşür.
Daxili mənbələrdən əsas kapitala yönəldilən vəsait ümumi sərmayənin 36,5 faizini təşkil edib.
Əsas kapitala yönəldilən sərmayənin ümumi dəyərində müəssisə və təşkilatların vəsaitləri 72,8 faiz, bank kreditləri 10,8 faiz, büdcə vəsaitləri 10,3 faiz, əhalinin şəxsi vəsaitləri 4,4 faiz, büdcədənkənar fondların vəsaitləri 1,2 faiz, sair vəsaitlər isə 0,5 faiz olub.
