Yeni prezident and içdi
Fransanın yeni prezidenti Emmanuel Makron mayın 14-də səlahiyyətlərinin icrasına başlayıb. Novator.az-ın məlumatına görə, Parisin Yelisey sarayında səlahiyyətləri müddəti başa çatan dövlət başçısı Fransua Olanddan təhvil alan Emmanuel Makron prezident andı içib.
İnauqurasiya mərasimində çıxış edən Emmanuel Makron deyib ki, üzərinə düşən məsuliyyəti daşımaq onun üçün şərəfdir. Prezident dünyanın və Avropanın Fransaya hər vaxt olduğundan daha çox ehtiyac duyduğunu vurğulayıb.
Emmanuel Makron 1977-ci il dekabrın 21-i Amyen şəhərində anadan olub. Paris Siyasi Tədqiqatlar İnstitutunu və Milli Administrasiya Məktəbini bitirib. Sosialist Partiyasının üzvü olub. Bank sektorunda çalışıb, Fransa prezidenti yanında baş katibin müavini olub. 2014-2016-cı illərdə iqtisadiyyat, sənaye və rəqəmli texnologiyalar naziri postunu tutub. 2016-cı ildə “İrəli” hərəkatını yaradıb.
Emmanuel Makron prezident seçkisinin ikinci turunda qalib gəlib. Mayın 7-də keçirilmiş seçkidə “İrəli” hərəkatının lideri 66,1% səslə Milli Cəbhənin lideri Marin Le Peni geridə qoyub.
Emmanuel Makron Fransanın 8-ci prezidentidir. Fransua Olanddan əvvəl dövlət başçısı postunu Şarl de Qoll, Jorj Pompidu, Valeri Jiskar d’Esten, Fransua Mitteran, Jak Şirak və Nikola Sarkozi tutublar.
