Vergi orqanlarına müraciət statistikası
Vergi orqanlarına 2017-ci ilin apreldə daxil olmuş vətəndaş müraciətlərinin hesabatı açıqlanıb. Novator.az-ın məlumatına görə, hesabatda bildirilir ki, ay ərzində vergi orqanlarına 10711 müraciət daxil olub, bu da ötən ilin müvafiq dövrü ilə müqayisədə 27% çoxdur. Müraciətlərin 5,5%-i şikayət xarakterli olub, 1,8%-i vergidən yayınma, nağd hesablaşmaların aparılması qaydalarının pozulması, qanunsuz sahibkarlıq fəaliyyəti, 0,2%-i vergi orqanlarının vəzifəli şəxslərinin hərəkəti (hərəkətsizliyi), 0,1%-i korrupsiya hüquqpozmaları məsələlərini əhatə edib.
Hesabata əsasən, müraciətlərin 77%-i müsbət həll olunub.
Hesabat dövründə vergi orqanlarında ümumilikdə 411 vətəndaş qəbul olunub. Aprel ayının 24-də vergilər naziri Fazil Məmmədov Saatlı rayonunda Saatlı, Şirvan, Sabirabad, Hacıqabul, Cəbrayıldan olan 33 vətəndaşı qəbul edib.
Vergilər Nazirliyinin Çağrı Mərkəzinin əməkdaşları canlı əlaqə zamanı 19765 zəngi cavablandırıb. Vergi ödəyicilərinə 177 809 SMS, ikitərəfli mesaj xidmətinin istifadəçilərinə 142777 SMS göndərilib.
Aprel ayı ərzində Vergilər Nazirliyinin rəsmi internet səhifəsinə 421309 daxilolma qeydə alınıb.
Vergi ödəyicilərinə xidmət strukturlarında 53623 vətəndaş qəbul edilib, onlara 75990 sayda xidmət göstərilib.
