Qaldı bir oyun
Mayın 11-də UEFA Avropa Liqasının yarımfinal mərhələsi başa çatıb. Novator.az-ın məlumatına görə, “Ayaks” (Hollandiya) səfərdə “Lion”a (Fransa) 1:3 hesabı ilə uduzsa da, finala adlayıb. İlk oyunda hollandlar 4:1 hesabı ilə üstün olmuşdular.
“Mançester Yunayted” (İngiltərə) – “Selta” (İspaniya) görüşü 1:1 hesabı ilə başa çatıb və ilk oyunda 1:0 hesabı ilə qalib gəlmiş ingilislər finala vəsiqə əldə ediblər.
Turnir 1971-2009-cu illərdə UEFA kuboku adlanıb. “Ayaks” 1992-ci ildə UEFA kubokuna sahib çıxıb.
Başqa turnirlərə baxsaq, “Ayaks” 4 dəfə (1971, 1972, 1973, 1995-ci illər) Çempionlar Liqasının (kubokunun) qalibi olub. “Mançester Yunayted”in həmin turnirdə 3 zəfəri (1968, 1999, 2008-ci illər) var.
“Ayaks” və “Mançester Yunayted” 1999-cu ilədək keçirilmiş Kuboklar kubokunu da hərəyə bir dəfə əldə ediblər.
