İlkin Rüstəmzadənin xəstəxanaya köçürülməsi məqsədəuyğun sayılmayıb
Ədliyyə Nazirliyinin Penitensiar Xidməti NİDA Vətəndaş Hərəkatının həbsdə olan üzvü İlkin Rüstəmzadənin xəstəxanaya köçürülməsini məqsədəuyğun saymayıb.
İlkin Rüstəmzadənin saxlandığı 13 saylı Cəzaçəkmə Müəssisəsinin həkimi gənc məhbusun Penitensiar Xidmətin müalicə müəssisəsinə köçürülməsi və zəruri müayinələrdən keçməsi üçün təqdimat vermişdi.
Məhbusun bacısı Türkan Rüstəmzadənin yaydığı məlumata görə, mayın 11-də o, qardaşı ilə telefonla danışıb. İlkin Rüstəmzadə deyib ki, təqdimata Penitensiar Xidmətdən cavab gəlib. Cavabda bildirilib ki, İlkin Rüstəmzadənin müalicə üçün xəstəxanaya yerləşdirilməsi əməliyyat şəraiti baxımından məqsədəuyğun sayılmır.
İlkin Rüstəmzadənin mədə xorası və nevrozdan əziyyət çəkdiyi bildirilir.
İlkin Rüstəmzadə 2013-cü ilin yazında daha 7 “Nida”çı gənclə birgə həbs olunub. Gənclər əsasən kütləvi iğtişaşları təşkil etmə cəhdində təqsirli biliniblər. İlkin Rüstəmzadədən başqa bütün NİDA-çılar dövlət başçısının imzaladığı əfv sərəncamları ilə azadlığa buraxılıblar.
