Balakən-Şəki bölgəsi: çaylarda suyun səviyyəsi artıb
Ekologiya və Təbii Sərvətlər Nazirliyinin Milli Hidrometeorologiya Departamentinin məlumatına görə, bəzi yerlərdə yağan leysan xarakterli intensiv yağışlar nəticəsində Balakən-Şəki bölgəsi çaylarında suyun səviyyəsində artım müşahidə olunub.
Hazırda Böyük Qafqazın Quba-Xaçmaz bölgəsi çaylarında sululuq ongünlük normanın 80-110, Kiçik Qafqazın çaylarında 40-160, Lənkəran-Astara bölgəsi çaylarında 30-40 faizini təşkil edir.
Mayın 12-də Kür çayının Qıraqkəsəmən məntəqəsində suyun səviyyəsində 4 santimetr, Qanıx çayının Əyriçay məntəqəsində isə 44 santimetr artım olub.
Mayın 12-də Kür çayının aşağı axınında suyun səviyyəsində əsasən azalma müşahidə edilib. Kür çayının Surra məntəqəsində 7, Şirvanda 2, Araz çayının Novruzlu məntəqəsində 1 santimetr azalma, Salyanda 11, Bankədə isə 15 santimetr artım qeydə alınıb.
Hazırda Surra məntəqəsində suyun səviyyəsi 361, Şirvanda 239, Salyanda 156, Bankədə 195, Araz çayının Novruzlu məntəqəsində 80 santimetrdir.
