Azərbaycan alması Ermənistanda baş yeyir
Ermənistanda vergi və gömrük qurumlarını idarə edən Dövlət Gəlirləri Komitəsinin məmurları rüşvət almaq ittihamı ilə tutulublar. Novator.az-ın məlumatına görə, bu, Azərbaycanda yetişdirilmiş almaların ölkədə satılması işi ilə bağlıdır. İş üzrə Baqrataşen gömrük məntəqəsinin inspektoru və növbə rəisi məsuliyyətə cəlb olunublar.
İstintaq müəyyən edib ki, məmurlar bəzi sahibkarlardan meyvə-tərəvəzin Baqrataşen gömrük məntəqəsindən baxışsız keçirilməsi üçün rüşvət alıblar. Bu məhsulların arasında Azərbaycanda yetişdirilmiş almalar da olub.
Azərbaycanda yetişdirilmiş almaların Ermənistanda satılması ötən ay üzə çıxıb. Ərzaq Məhsullarının Təhlükəsizliyi Dövlət Xidməti aprelin 23-dən ölkənin bazarlarında geniş yoxlamalar aparıb, sərhəd nəzarətindən keçməmiş Azərbaycan məhsulları bazarlardan yığışdırılıb və onlar məhv edilib.
