Jurnalistlərin ikinci binası iyulun 22-də təhvil veriləcək
Bakının Bibiheybət qəsəbəsində jurnalistlərə tikilən yeni yaşayış binası bu il iyulun 22-də – Azərbaycan Jurnalistikası Günü istifadəyə veriləcək. Bunu APA-ya Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru Vüqar Səfərli deyib. Onun sözlərinə görə, mənzillər jurnalistlərə həmin gün təqdim ediləcək.
Jurnalistlərin yeni binası 255 mənzillidir. Prezident İlham Əliyevin sərəncamları ilə Kütləvi İnformasiya Vasitələrinin İnkişafına Dövlət Dəstəyi Fonduna tikinti üçün dövlət büdcəsindən üst-üstə 16 milyon manat ayrılıb.
Novator.az xatırladır ki, 156 mənzilli ilk bina 4 il əvvəl Azərbaycan Jurnalistikası Günü mətbuat işçilərinə pulsuz təqdim olunub.
İlk binada mənzillərin bölüşdürülməsi meyarlarına əsasən, son 3 ildə mütəmadi olaraq yayımlanan KİV həmin redaksiyada 3 il fəaliyyət göstərmiş və ümumilikdə 10 il jurnalistlik təcrübəsinə malik əməkdaşlarının adlarını namizəd kimi irəli sürə bilib. Media quruluşlarının uzağı 3 namizəd vermək hüququ olub.
