1143 keçmiş məhbus birdəfəlik müavinət alıb
Əmək və Əhalinin Sosial Müdafiəsi Nazirliyi bu ilin birinci rübündə penitensiar müəssisələrdə cəza çəkməkdən azad edilən 1143 nəfərə birdəfəlik müavinət verib. Rəsmi hesabata görə, həmin şəxslərin hər birinə minimum əməkhaqqının 4 misli qədər (464 manat) birdəfəlik müavinət ödənilib.
Qeyd olunur ki, penitensiar müəssisələrdə cəza müddəti başa çatmaq ərəfəsində olan şəxslərin əmək bazarının tələblərinə uyğun peşələr üzrə peşə hazırlığına cəlb olunması işləri də davam etdirilir. 2017-ci ildə Əmək və Əhalinin Sosial Müdafiəsi Nazirliyi yanında Dövlət Məşğulluq Xidmətinin xətti ilə ayrı-ayrı penitensiar müəssisələrdə cəza müddəti başa çatmaqda olan 112 nəfər şəxs üçün həmin müəssisələrin nəzdindəki peşə məktəblərinin bazasında peşə hazırlığı kursları təşkil edilib. Elektrik qaz qaynaqçısı, avtomobillərin təmiri üzrə çilingər, kompüter texnikasının təmiri və s. peşələr üzrə təşkil edilən kursları bitirənlərə sertifikatlar verilib.
