Xəbərdarlıq: hava soyuyacaq
Ekologiya və Təbii Sərvətlər Nazirliyinin Milli Hidrometeorologiya Departamentinin məlumatına görə, Bakıda və Abşeron yarımadasında mayın 11-dən 12-si gündüzədək güclü şimal-qərb küləyinin əsəcək, havanın temperaturu ötən günlərlə müqayisədə tədricən 5-9 dərəcə enəcək.
Məlumat Novator.az-a nazirliyin mətbuat xidmətindən verilib. Məlumatda tibbi-meteoroloji proqnoz da əksini tapır. Bildirilir ki, mayın 11-12-də Abşeron yarımadasında güclü xəzri küləyi fonunda havanın temperaturunun ötən günlərlə müqayisədə xeyli aşağı enməsi meteohəssas insanlar üçün əlverişsizdir.
Rayonlarda da hava şəraiti dəyişəcək. Mayın 11-i gündüzdən 13-ü səhərədək rayonlarda hava şəraitinin qeyri-sabit keçəcəyi, bəzi yerlərdə şimşək çaxacağı, arabir yağış yağacağı, ayrı-ayrı yerlərdə intensiv olacağı, dolu düşəcəyi gözlənilir. Qərb küləyi əsəcək, ayrı-ayrı yerlərdə arabir güclənəcək. Havanın temperaturu ötən günlərlə müqayisədə tədricən 5-9 dərəcə enəcək. Çaylarda sululuğun artacağı ehtimalı var.
