Tramp Obamanın kadrını işdən qovdu
ABŞ prezidenti Donald Tramp mayın 9-da Federal Təhqiqatlar Bürosunun direktoru Ceyms Komini tutduğu postdan azad edib. Novator.az-ın məlumatına görə, prezident bu addımı baş prokuror (ədliyyə naziri) Ceff Seşnsin məsləhəti ilə atıb.
Ceyms Komi Federal Təhqiqatlar Bürosunun direktoru postuna Barak Obamanın prezidentliyi dövründə, 2013-cü ildə 10 il müddətinə təyin olunmuşdu.
Son vaxtlar Federal Təhqiqatlar Bürosu Donald Trampın komandasının Rusiya ilə əlaqələrini araşdırırdı. Ağ ev bu araşdırmalardan narazı idi.
Ötən il noyabrın 8-də keçirilmiş ümumxalq seçkisində Respublikaçılar Partiyasının namizədi olmuş Donald Tramp Demokratlar Partiyasından Hillari Klintonu məğlub edib. O, 538 nəfərlik Seçicilər Kollegiyasına 306, Hillari Klinton isə 232 nümayəndə qazanıb. Seçicilər Kollegiyası dekabrın 19-da prezident seçkisi ilə bağlı yekun qərarını verib. Səsvermədə 304 nəfər Donald Trampı, 227 nəfər Hillari Klintonu dəstəkləyib. Seçicilər Kollegiyasındakı səsvermənin nəticəsi Konqresin yanvarın 6-da keçirilən iclasında təsdiqlənib. Yanvarın 20-də Donald Tramp and içərək səlahiyyətlərinin icrasına başlayıb.
8 noyabr seçkisindən dərhal sonra rəsmi Vaşinqton Rusiyanı prezident seçkisinə müdaxilədə ittiham edib. Qeyd olunub ki, rusiyalı hakerlər Demokratlar Partiyasının serverini yararaq oradan bəzi yazışmaları ələ keçirib yayıblar, nəticədə demokratların namizədi Hillari Klintonun gözdən salınmasına və seçkini Respublikaçılar Partiyasının namizədi Donald Trampın udmasına nail olublar. Rusiyalı hakerlərin seçki qurumlarının saytlarına da müdaxilə etdiyi vurğulanır.
Ötən il dekabrın 29-da ABŞ Rusiyaya bununla bağlı qarşı yeni sərt qərarlar verib. 35 diplomat ölkədən qovulub, Rusiya Müdafiə Nazirliyinin Baş Kəşfiyyat İdarəsi, Rusiya Federal Təhlükəsizlik Xidməti də daxil olmaqla bəzi qurumlara, fiziki şəxslərə, kiber hücumlara maliyyə dəstəyi şirkətlərə sanksiya qoyulub.
