Polislər ağacəkmə kampaniyası keçiriblər
Daxili İşlər Nazirliyinin rəhbərliyi və şəxsi heyəti, Daxili Qoşunların hərbi qulluqçuları Heydər Əliyevin anadan olmasının 94-cü ildönümü münasibətilə Suraxanı rayonu ərazisindəki yaşıllıq massivində növbəti ağacəkmə kampaniyası keçiriblər.
Nazirliyin mətbuat xidmətindən verilən məlumata görə, polis əməkdaşları və Daxili Qoşunların hərbi qulluqçuları hələ 2010-cu ildə sözügedən 5 hektarlıq sahədə Abşeron yarımadasının iqlim şəraitinə daha uyğun və dözümlü, dekorativ Eldar şamları və zeytun ağacları əkiblər.
Budəfəki kampaniya zamanı ağaclara aqrotexniki qaydada qulluq göstərilib, ərazi alaq otlarından təmizlənərək budama və suvarma işləri aparılıb, ağacların küləkdən qorunması və normal böyümələri üçün qoruyucu dirəklər basdırılıb. Bundan əlavə, sözügedən sahədə abadlıq və təmizləmə işləri görülərək boş qalmış yerlərə əlavə olaraq 600 ədəd yeni Eldar şamının tingləri əkilib.
