Mühacirlər Berlində piket keçiriblər
Mayın 10-da bir qrup mühacir Azərbaycanın Berlindəki səfirliyi qarşısında etiraz aksiyası keçirib. Azadliq.org-un məlumatına görə, aksiya gənc fəallar Bayram Məmmədov və Qiyas İbrahimovun həbsinin ildönümünə həsr olunub.
Bayram Məmmədov və Qiyas İbrahimov 2016-cı il mayın 10-da, mərhum prezident Heydər Əliyevin doğum günü keçirilən ənənəvi gül bayramında onun Bakıdakı abidəsinə şüar yazdıqdan sonra tutulublar, narkotik ticarətində ittiham olunaraq 10 il müddətinə azadlıqdan məhrum ediliblər.
Berlindəki aksiyada bloqçu Mehman Qələndərovun ölümündə təqsirli şəxslərin cəzalanması da tələb olunub. Rəsmi açıqlamaya görə, bloqçu Mehman Qələndərov 2017-ci il aprelin 28-də Bakı İstintaq Təcridxanasının kamerasında özünü asıb.
2017-ci il fevralın 7-də Mehman Qələndərov “Facebook” səhifəsində Qiyas İbrahimov və Bayram Məmmədovu müdafiə xarakterli fikirlər yazıb. Bir saat sonra polis əməkdaşları Mehman Qələndərovun kirayədə yaşadığı mənzilə gələrək onu tutublar. Bloqçuya narkotik vasitələrinin qanunsuz dövriyyəsi ilə bağlı ittiham irəli sürülüb və barəsində həbs qətimkan tədbiri seçilib.
