Hökumət yarıbayarı ixtisar olunur
Moldova hökuməti nazirliklərin sayını 16-dan 9-a salmağa hazırlaşır. Novator.az-ın məlumatına görə, hakim Demokrat Partiyasının sədri Vladimir Plaxotnyuk mayın 10-da belə açıqlama verib.
Hökumət islahatları çərçivəsində İqtisadiyyat və İnfrastruktur Nazirliyi yaratmaq təklif olunur. Bu nazirliyə İqtisadiyyat Nazirliyi, Regional İnfrastruktur və Tikinti Nazirliyi, Nəqliyyat və Yol İnfrastrukturu Nazirliyi, Rabitə və İnformasiya Nazirliyi, habelə bir sıra dövlət agentliyi daxil olacaq.
Səhiyyə və sosial məsələlər nazirliklərinin, maarif, mədəniyyət, gənclər və idman nazirliklərinin, kənd təsərrüfatı və ekologiya nazirliklərinin də birləşdiriləcəyi gözlənir.
Baş nazir müavinlərinin sayını 4-dən 3-ə endirmək planlaşdırılır.
Mərkəzi və yerli administrasiyada islahatlar Moldovanın Avropa İttifaqı qarşısında götürdüyü öhdəliklərə daxildir. Avropa İttifaqı islahatlara 50 milyon avroya yaxın vəsait ayırmağa hazırdır.
Səidə Hüseynova
