Sərkisyan Qarabağdadır
Ermənistan prezidenti Serj Sərkisyan mayın 7-də Azərbaycanın işğaldakı torpaqlarına qanunsuz səfərə gəlib. Novator.az-ın məlumatına görə, Serj Sərkisyanı Xankəndi aeroportunda işğalçı Dağlıq Qarabağ rejiminin başçısı Bako Saakyan qarşılayıb.
Səfərin məqsədi bayram tədbirlərində iştirakdır. Dağlıq Qarabağ erməniləri mayın 9-da ordu gününü və Şuşanın alınması gününü qeyd edirlər.
2008-ci ildən prezident postunu tutan Serj Sərkisyan 26-cı dəfədir Dağlıq Qarabağa qanunsuz səfər edir. O, işğalçı müharibənin qaniçən liderlərindən biridir. 1989-cu ildən Dağlıq Qarabağ separatçılarının komandanı, 1993-cü ildən isə Ermənistanın müdafiə naziri olub, sonrakı illərdə müxtəlif rəhbər vəzifələrdə çalışıb, o cümlədən baş nazir kürsüsünü tutub.
1988-ci ildən başlayaraq Ermənistanın Azərbaycana hərbi təcavüzü nəticəsində Dağlıq Qarabağ bölgəsi (Ağdərə, Xocavənd, Xankəndi, Xocalı, Şuşa) və daha 7 rayon (Laçın, Kəlbəcər, Zəngilan, Qubadlı, Cəbrayıl, Ağdam, Füzuli) zəbt edilib.
