Maliyyə Bazarlarına Nəzarət Palatası niyə susur?
Maliyyə Bazarlarına Nəzarət Palatası aprelin 17-də ona ünvanlanan sorğuya bu günə qədər cavab vermir.
Aprel ayında Novator.az saytına şikayət daxil olub. Bildirilib ki, bankalarda, o cümlədən “Azərpoçt”un şöbələrində Rusiya rublunun milli valyutaya konvertasiyasında problem yaşanır, banklara və poçt şöbələrinə müraciət edildikdə rubl qəbul etmədiklərini, yaxud da qoyulan limitin dolduğunu deyirlər.
Araşdırma nəticəsində məlum olub ki, bir müddətdir banklar və poçt şöbələri Rusiya rublunu nağd almaqdan imtina edirlər.
Banklar və poçt şöbələri niyə Rusiya valyutasını almır? Bu problemlə üzləşənlər üçün çıxış yolu nədir? Məsələ nə vaxt həllini tapacaq?
Novator.az məsələyə aydınlıq gətirmək üçün Maliyyə Bazarlarına Nəzarət Palatasına müraciət edib. Palatanın mətbuat xidmətində Novator.az-ın sorğusunu qəbul edərək cavablandıracaqlarına söz veriblər. Mətbuat xidməti ilə müntəzəm əlaqə saxlayan sayt əməkdaşına hər dəfə “cavab hazırlanır, göndəriləcək” deyiblər. Təəssüf ki, müraciət olunan vaxtdan 20 gündən çox keçsə də, sorğu hələ də cavabsız qalır.
Maliyyə Bazarlarına Nəzarət Palatası prezidentin 3 fevral 2016-cı il fərmanı ilə qiymətli kağızlar bazarı, investisiya fondları, sığorta, kredit təşkilatları (bank, bank olmayan kredit təşkilatları və poçt rabitəsinin operatoru) və ödəniş sistemləri fəaliyyətinin lisenziyalaşdırılması, tənzimlənməsi və nəzarəti məqsədi ilə yaradılıb.
