Çaylarda suyun səviyyəsi azalıb
Ekologiya və Təbii Sərvətlər Nazirliyinin Milli Hidrometeorologiya Departamenti ölkə çaylarında və transsərhəd çaylarda vəziyyətlə bağlı açıqlama yayıb.
Açıqlamada bildirilir ki, hazırda Böyük Qafqazın Quba-Xaçmaz bölgəsi çaylarında sululuq ongünlük normanın 70-110, Kiçik Qafqazın çaylarında 50-180, Lənkəran-Astara bölgəsi çaylarında isə 20-60 faizini təşkil edir.
Tranzit çaylarda vəziyyətə gəlincə, mayın 8-də Kür çayının Qıraqkəsəmən məntəqəsində suyun səviyyəsində 4 santimetr, Qanıx çayının Əyriçay məntəqəsində isə 7 santimetr azalma müşahidə olunub.
Kür çayının aşağı axınında suyun səviyyəsində mühüm dəyişiklik yoxdur. Kür çayının Surra məntəqəsində 8, Şirvanda 2, Araz çayının Novruzlu məntəqəsində 1 santimetr azalma qeydə alınıb, Salyan və Bankədə isə suyun səviyyəsində dəyişiklik müşahidə olunmayıb.
Hazırda Surra məntəqəsində suyun səviyyəsi 368, Şirvanda 205, Salyanda 135, Bankədə 167, Araz çayının Novruzlu məntəqəsində isə 56 santimetrdir.
