Hava və su adamları necə öldürür? (Beynəlxalq hesabat)
2050-ci ilə kimi planetdə əhalinin 70%-i şəhərlərdə yaşayacaq. Dünya Səhiyyə Təşkilatının hesabatında belə deyilir. Novator.az-ın məlumatına görə, açıqlamada qeyd olunur ki, insanlar üçün böyük imkanlar açsa, daha keyfiyyətli tibbi xidmət təklif etsə də, şəhər sağlamlıq üçün yüksək risk zonasıdır.
Təşkilatın materialında ətraf mühit problemlərinin insan sağlamlığına təsiri haqda statistika yer alır. Statistikaya görə, dünyada hər dörd nəfərdən biri, əsasən də pis ekologiyaya həssas azyaşlılar və qocalar ətraf mühitin problemləri üzündən həyatını itirir.
Hesabata əsasən, ildə 12,6 milyon adam qeyri-sağlam ekoloji şəraitdə yaşadığı və ya işlədiyi üçün ölür. 1,7 milyon uşaq ətraf mühitin problemləri üzündən yaranan xəstəliklərdən (əsasən tənəffüs yolu və mədə-bağırsaq xəstəliklərindən) həyatını itirir.
Hər il dünyada 4,9 milyon yaşlı adam ətraf mühit problemləri üzündən yaranmış xəstəlikdən, əsasən də qeyri-yoluxucu xəstəliklərdən ölür.
Havanın, suyun, torpağın çirklənməsi, zərərli kimyəvi maddələr, iqlim dəyişikliyi, ultrabənövşəyi şüalar 100-dən çox xəstəliyin yaranmasına səbəb olur.
Xəstəlik sayının artmasının əsas səbəbi çirkli havadır. Havanın tərkibindəki zərərli maddələr tənəffüs orqanlarına, əsəb və immun, qan dövranı və həzm sistemlərinə, qanyaradıcı orqanlara, habelə inkişaf prosesinə mənfi təsir edir.
Dünya Səhiyyə Təşkilatı şəhərlərdə havanın getdikcə pisləşdiyi nəticəsinə gəlib. Təşkilatın məlumatına görə, planet əhalisinin 80%-i çirklənmə səviyyəsinin yüksək olduğu rayonlarda yaşayır. Səbəb nəqliyyat və sənaye müəssisələridir.
Təşkilatın hesabatında vurğulanır ki, sağlamlığın əsas faktorlarından biri də təhlükəsiz sudur. Amma dünyada 1,8 milyard adam kanalizasiya ilə çirklənmiş sudan istifadə etməyə məcburdur.
Təşkilat 2025-ci ilə qədər dünya əhalisinin yarısının su çatışmayan rayonlarda yaşayacağını proqnozlaşdırır.
