Elektron xidmətlərə 3,8 milyon dəfə müraciət olunub
Əmək və Əhalinin Sosial Müdafiəsi Nazirliyinin elektron xidmətlərinə aprel ayında 1 milyon 225 min 575 dəfə müraciət edilib, bu da 2016-cı ilin müvafiq dövrü (637 674 müraciət) ilə müqayisədə 1,9 dəfə çoxdur. Rəsmi məlumata əsasən, nazirliyin əmək münasibətlərinin rəsmiləşdirilməsi, pensiya və sosial sığorta münasibətləri, iş yerinə dair arayışın əldə olunması, əmək qabiliyyətinin müvəqqəti itirilməsinə, hamiləliyə və doğuma, uşağın anadan olmasına, uşağın üç yaş tamam olanadək ona qulluq etməyə görə müavinətlə bağlı haqq-hesab cədvəlinin təqdim olunması və s. üzrə e-xidmətləri əhalinin istifadəsindədir. Həmçinin ünvanlı dövlət sosial yardımı və əlilliyin qiymətləndirilməsi üzrə bütün xidmətlər avtomatlaşdırılmış sistemlər üzərindən elektron müstəvidə təqdim olunur, pensiyaların, işsizlik müavinətinin, sosial müavinətlərin, təqaüdlərin hesablanması üçün kalkulyator və s. üzrə e-xidmətlər fəaliyyət göstərir.
Bu il aprelin 1-dən məcburi dövlət sosial sığortası üzrə hesabatların təqdim edilməsi üçün yeni elektron sistem də istifadəyə verilib, sistemə ötən ay ərzində 330 211 dəfə müraciət olunub.
Ümumilikdə yanvar-aprel aylarında Əmək və Əhalinin Sosial Müdafiəsi Nazirliyinin elektron xidmətlərinə 3 milyon 832 min 213 müraciət qeydə alınıb.
