Dövlət komitəsindən xidmət xatırlatması
Əmlak Məsələləri Dövlət Komitəsi fəaliyyət sahələri üzrə 3 SMS xidməti və 31 elektron xidmət, o cümlədən 3 onlayn xidmət təqdim edir. Xidmətlər E-gov.az-da və komitənin elektron xidmətlər portalı E-emdk.gov.az-da göstərilir.
Rəsmi məlumata görə, təqdim edilən 31 elektron xidmətdən 21-i daşınmaz əmlakın qeydiyyatı, 10-u dövlət əmlakının özəlləşdirilməsi, idarə edilməsi və icarəsi ilə bağlıdır. Xidmətlərin 27-si interaktiv, 4-ü informativdir.
Komitənin elektron xidmətlərinə daşınmaz əmlakın qeydiyyatı, dövlət əmlakının səmərəli idarə edilməsi, dövlət əmlakının özəlləşdirilməsi məqsədilə keçirilən hərraclar, dövlət əmlakının icarəsi ilə bağlı interaktiv və informativ xidmətlər daxildir. İndiyədək vətəndaşlara, fiziki və hüquqi şəxslərə müxtəlif fəaliyyət istiqamətləri üzrə 500 mindən çox elektron xidmət göstərilib. Daşınmaz əmlakın qeydiyyatı üzrə 21 elektron xidmətdən istifadə edənlərin sayı 140 mindən çox olub.
Elektron xidmətlərdən istifadə edənlərin böyük hissəsi, təqribən 300 mini daşınmaz əmlakın hüquqi vəziyyəti ilə bağlı arayış (“Forma-1”) alıb. Hər ay vətəndaşlara orta hesabla 10 mindən artıq “Forma-1” onlayn formada təqdim edilir.
İstifadəyə verilən 31 elektron xidmətin 3-dən eyni zamanda SMS vasitəsilə ilə də istifadə edilir. Mobil telefonlardan 9193 nömrəsinə SMS göndərməklə daşınmaz əmlakın qeydiyyatı ilə bağlı müraciət üzrə xidmət haqqı, daşınmaz əmlakın qeydiyyatı ilə bağlı müraciətin icra vəziyyəti və dövlət əmlakının icarəyə verilməsi müqavilələri üzrə icarə haqqı borcunu öyrənmək mümkündür.
