Çökən banklar üçün yeni qayda
Prezident İlham Əliyev fərman imzalayaraq “Ödəmə qabiliyyətini itirmiş bankların rezolyusiyası və sağlamlaşdırma tədbirləri çərçivəsində qeyri-işlək (toksik) aktivlərin təqdim edilməsi qaydası”nı təsdiqləyib. Novator.az-ın məlumatına görə, sənəddə qeyd olunur ki, ödəmə qabiliyyətini itirmiş bankların rezolyusiyası və sağlamlaşdırma tədbirləri çərçivəsində qeyri-işlək (toksik) aktivlərin təqdim edilməsi “Banklar haqqında” qanuna uyğun olaraq həmin qeyri-işlək (toksik) aktivlərə mülkiyyət hüququnun, habelə aktivlərlə birlikdə təqdim olunan təminata girov hüququnun özgəninkiləşdirilməsindən ibarətdir.
Qaydaya əsasən, qeyri-işlək (toksik) aktivlərin təqdim edilməsindən əvvəl bank həmin aktivlərin göstərilən kateqoriyaya aid olması barədə Maliyyə Bazarlarına Nəzarət Palatasının rəyini alır. Rəy 20 gün müddətində verilməlidir.
Ödəmə qabiliyyətini itirmiş bankın rezolyusiyası və sağlamlaşdırma tədbirləri çərçivəsində qeyri-işlək (toksik) aktivlərin təqdim edilməsi Mülki Məcəllə ilə müəyyən edilmiş mülki-hüquqi müqavilələrə uyğun olaraq həyata keçirilir.
Təqdim edilən qeyri-işlək (toksik) aktivlər digər aktivlərlə birlikdə təqdim olunursa, müqavilədə qeyri-işlək aktivlər barədə məlumatlar ayrıca qeyd olunmalıdır.
Qeyri-işlək (toksik) aktivlərin dəyərini müqavilə tərəflərinin qarşılıqlı razılığı əsasında müstəqil qiymətləndirici (müstəqil qiymətləndiricilər) müəyyən edir. Müqavilədə ən azı bunlar göstərilməlidir: müqavilənin tərəfləri, predmeti, məbləği; tərəflərin hüquq və vəzifələri, məsuliyyəti; qeyri-işlək (toksik) aktivlərə ödəmə qabiliyyətini itirmiş bankın mülkiyyət hüququnu yaradan müqavilənin tərəfləri, tarixi, nömrəsi.
