Böyük Britaniya parlamenti buraxıldı
Mayın 3-nə keçən gecə Böyük Britaniya parlamenti buraxılıb. Novator.az-ın məlumatına görə, bu, iyunun 8-də keçiriləcək növbədənkənar seçki ilə bağlıdır.
Parlamentin buraxılması İcmalar Palatasının işinin başa çatması, deputatların imtiyazlarının itirilməsi deməkdir.
İcmalar Palatası aprelin 19-da növbədənkənar seçki qərarı verib. Növbəti parlament seçkisi 2020-ci ildə keçirilməli idi. Yeni seçki qərarı Böyük Britaniyanın Avropa İttifaqından çıxması fonunda, daha güclü hökumət qurmaq istəyi ilə qəbul edilib.
Ötən il iyunun 23-də Böyük Britaniyada ölkənin Avropa İttifaqında qalıb-qalmamasını müəyyənləşdirən referendum keçirilib. Referenduma qatılanların çoxu Britaniyanın Avropa İttifaqından çıxmasına səs verib. Avropa İttifaqında qalmaq tərəfdarı olan baş nazir Devid Kemeron məğlubiyyətə görə istefaya gedib. İyulun 13-də Tereza Mey baş nazir postuna təyin edilib.
