Yeni turizm qanunu ilk oxunuşdan keçdi
Mayın 2-də Milli Məclis “Turizm haqqında” qanunu ilk oxunuşda qəbul edib. 63 maddədən ibarət qanun Azərbaycanda turizm sahəsində dövlət tənzimləməsi, turizmin dövlət idarəetməsi və dövlət nəzarəti, turizm ehtiyatları, turizm fəaliyyətinin təşkili, turizm sahəsində təhlükəsizlik, maliyyə mənbələrinin təsnifatı, investisiya qoyuluşu və bu sahənin digər üsullarla stimullaşdırılması, sığorta və məlumatlandırma məsələləri ilə bağlı münasibətləri tənzimləyir.
Novator.az bildirir ki, layihəyə görə, turizm sahəsində mərkəzi icra hakimiyyəti orqanları, qanunvericilik hakimiyyəti orqanları, həmin orqanların təsis etdikləri ölkə miqyaslı digər təşkilatlar istehlakçıların və turizm təşkilatçılarının hüquqlarını təmin edir, o cümlədən bu hüquqların qorunması üçün hüquq mühafizə sistemindən istifadə edir, hüquqların məhkəmələr vasitəsi ilə qorunmasını və bərpasını təşkil edir və başqa işləri həyata keçirir.
Sənədə əsasən, dövlət turizm fəaliyyətini gömrük, investisiya, viza rejimi, rüsum və digər məcburi ödənişlərə güzəşt və imtiyazlar vasitəsi ilə, habelə tariflərdə güzəşt və imtiyazlar verilməsi, maliyyə institutlarının vəsaitlər ayırması, sosial-iqtisadi proqramların tətbiqi və qanunla qadağan edilməyən digər vasitələrlə stimullaşdırır.
Layihədə turizm sahəsində bələdiyyə orqanlarının səlahiyyətləri də göstərilir.
Qanun qüvvəyə mindiyi gündən “Turizm haqqında” 4 iyun 1999-cu il qanunu qüvvədən düşəcək (Layihə).
