Ərdoğan partiyasına döndü
Türkiyə prezidenti Rəcəb Teyyub Ərdoğan mayın 2-də yenidən Ədalət və İnkişaf Partiyasına (AKP) üzv olub. Novator.az-ın məlumatına görə, hakim partiyanın Ankaradakı mərkəzi qərargahında keçirilən təntənəli mərasimdə prezident AKP üzvü olmaq haqqında sənədi imzalayıb.
Türkiyə prezidenti partiya üzvü olmaq hüququnu aprelin 16-da keçirilmiş konstitusiya referendumundan sonra əldə edib. Referendumun nəticələrinə görə, seçicilərin 51,41 faizi ana qanunda 18 maddəlik dəyişiklik təklifinin lehinə səs verib. Bununla da dövlət başçısı partiya üzvü olmaq hüququ alıb. Əsas yenilik isə ölkənin 2019-cu ildən prezident idarə üsuluna keçməsidir.
Ana qanunu dəyişdirmək Ədalət və İnkişaf Partiyasının təşəbbüsü olub. Bu partiya 2002-ci ildən bəri təkbaşına hakimiyyətdədir. Partiyanın qurucu lideri Rəcəb Teyyub Ərdoğan 2003-cü ildən 2014-cü ilədək baş nazir olub. 28 avqust 2014-cü ildən prezidentdir. Həmin gün partiyadan çıxıb.
Ədalət və İnkişaf Partiyası 2001-ci il avqustun 14-də yaradılıb.
Mayın 21-də keçiriləcək növbədənkənar qurultayda Rəcəb Teyyub Ərdoğan AKP sədri seçiləcək. Hazırda partiyaya baş nazir Binəli Yıldırım sədrlik edir.
