Lökbatanda palçıq vulkanı püskürüb
Bakı şəhərindən 15 kilometr cənub-şərq istiqamətində, Xəzər dənizinin sahilində, neft-mədən sahəsində yerləşən Lökbatan palçıq vulkanında püskürmə baş verib.
Ekologiya və Təbii Sərvətlər Nazirliyinin yaydığı məlumata görə, püskürmə mayın 2-si səhər saat 8 radələrində baş qaldırıb.
Hazırda “Bakı və Abşeron yarımadasının palçıq vulkanları qrupu Dövlət Təbiət Qoruğu”nun əməkdaşlarından ibarət operativ qrup ərazidə müşahidələr aparır.
Nazirlik onu da qeyd edir ki, Lökbatan palçıq vulkanı əslində sözügedən qoruğa aid deyil.
“Bakı və Abşeron yarımadasının palçıq vulkanları qrupu Dövlət Təbiət Qoruğu” 2007-ci ildə palçıq vulkanlarının əhəmiyyətini nəzərə alaraq bu təbiət sərvətlərinin gələcək nəsillərə çatdırılması və ölkənin təbii irsinin geniş miqyasda təbliğ olunması məqsədilə yaradılıb. Qoruq Bakı və Abşeron yarımadasında yerləşən palçıq vulkanlarının bir hissəsini əhatə edir.
1810-cu ildə qeydə alınmış Lökbatan palçıq vulkanı dünyanın ən aktiv 5 vulkanından biridir. Püskürməsinə görə isə dünyada ilk yeri tutur. Vulkanın hazırkı püskürməsi sayca 25-cidir.
