Lökbatan vulkanında püskürmə 4 dəqiqə çəkib
Mayın 2-də Lökbatan palçıq vulkanında püskürmə 4 dəqiqə çəkib. Vulkanın dərinliyi 4 kilometr olub.
Novator.az-ın məlumatına görə, bununla bağlı Milli Elmlər Akademiyası nəzdində Respublika Seysmoloji Xidmət Mərkəzi açıqlama yayıb.
Açıqlamada deyilir ki, püskürmədən öncə, aprelin 28-də ərazidə 1,8 bal gücündə zəlzələ olmuşdu. Püskürmədən təxminən 2 saat yarım sonra isə 3 bal gücündə zəlzələ qeydə alınıb.
Bakı şəhərindən 15 kilometr cənub-şərq istiqamətində, Xəzər dənizinin sahilində, neft-mədən sahəsində yerləşən Lökbatan palçıq vulkanında püskürmə səhər saat 8 radələrində baş verib.
Lökbatan palçıq vulkanı dünyanın ən aktiv 5 vulkanından biridir. Püskürməsinə görə isə dünyada ilk yeri tutur. Vulkanın hazırkı püskürməsi sayca 25-cidir.
