Milli çempionatlarda vəziyyət nə yerdədir?
Münhenin “Bavariya” komandası Almaniya futbol birinciliyində sona 3 tur qalmış çempionluğu təmin edib. 31 turda 73 xal toplayan “Bavariya” ən yaxın izləyicisi “Leypsiq”i 10 xal qabaqlayaraq əlçatmaz olub.
UEFA-nın bir neçə aparıcı üzvünün də çempionları bəllidir. Novator.az-ın məlumatına görə, İsveçrədə “Bazel”, Yunanıstanda “Olimpiakos”, Şotlandiyada “Seltik” milli çempionat başa çatmamış qızıl medallara sahib çıxıblar.
İspaniya çempionatında sona 3 tur qalmış “Barselona” 81 xalla zirvədə qərar tutub. Bir oyun az keçirən “Real” da 81 xal yığıb.
İngiltərə çempionatında 81 xalla “Çelsi” liderlik edir. “Tottenhem” 77 xalla ikincidir. Bu komandaların hərəyə 4 oyunu qalır.
İtaliyada sona 4 tur qalmış “Yuventus” liderdir: 84 xal. “Roma” 75 xalla ikinci, “Napoli” 74 xalla üçüncü pillədədir.
Fransada sona 3 tur qalmış ehtiyatda bir oyunu olan “Monako” 83 xalla öndə gedir. PSJ 80, “Nitsa” 77 xal toplayıb.
Hollandiyada çempionatın bitməsinə 2 tur qalır, qızıl medallara iki komanda iddia edir. İlk sırada qərar tutan “Feyenoord”un 79, onu izləyən “Ayaks”ın 75 xalı var.
Portuqaliyada sona 3 tur qalmış “Benfika” 75, “Portu” 72, “Sportinq” 67 xal yığıb.
Türkiyədə yekuna 5 tur qalmış 64 xalla “Beşiktaş” liderlik edir. Onun ən yaxın izləyicisi “Başakşəhər”in 60 xalı var.
