Bayram Məmmədov vəziyyətinin ağır olduğunu söyləyib
Həbsdə olan gənc fəal Bayram Məmmədov ombudsman Elmira Süleymanovanın və Beynəlxalq Qırmızı Xaç Komitəsinin Bakıdakı nümayəndələrinin ona baş çəkməsini istəyir.
Bu haqda ictimaiyyəti onun vəkili Elçin Sadıqov məlumatlandırıb.
Vəkil sosial şəbəkədə yazıb ki, aprelin 29-da 13 saylı Cəzaçəkmə Müəssisəsində Bayram Məmmədovla görüşüb. Bayram Məmmədov həbsxanada rəhbərliyin ona münasibətindən şikayətlənib, qanunsuzluğa, qeyri-insani davranışa məruz qaldığını, ağır xəstələndiyini söyləyib. Bildirib ki, sanki bütün bu hərəkətlər onun fiziki məhvinə yönəlib.
Bayram Məmmədov xahiş edib ki, ombudsman və Beynəlxalq Qırmızı Xaç Komitəsinin nümayəndələri ona baş çəksinlər və beləliklə, onun fiziki məhvinin qarşısını alsınlar.
Bayram Məmmədov digər gənc fəal Qiyas İbrahimovla birgə 2016-cı il mayın 10-da həbs edilib. Gənclər külli miqdarda narkotik vasitə saxlamaqda təqsirli biliniblər. Bakı Ağır Cinayətlər Məhkəməsi oktyabrın 25-də Qiyas İbrahimovu, dekabrın 8-də isə Bayram Məmmədovu 10 il müddətinə azadlıqdan məhrum edib.
Müdafiəçiləri hər iki gəncin siyasi sifarişlə tutulduğunu iddia edirlər. Bildirilir ki, mayın 10-na gecə Bakının mərkəzində Heydər Əliyevin abidəsinin üzərində etiraz şüarları yazılıb, gənclər bu şüarlara görə tutulub.
