Bakı Ali Neft Məktəbinin kampusu açılıb
Prezident İlham Əliyev mayın 1-də SOCAR-ın Bakı Ali Neft Məktəbinin kampusunun açılışında iştirak edib. Kampus Bakının Səbail rayonunun Bibiheybət qəsəbəsində inşa olunub.
AZƏRTAC xəbər verir ki, inşasına 2012-ci ilin aprel ayında başlanmış kampusun ümumi ərazisi 7 hektardır. Bunun 47 min kvadratmetri ümumi tikinti sahəsi, 42 min kvadratmetri isə əsas korpusun sahəsidir. Kampusda əsas korpus, 400 çarpayılıq yataqxana, fitnes mərkəzi, 1000 yerlik süni örtüklü stadion, iki qazanxana, 10 kilovoltluq elektrik yarımstansiyası, iki su hovuzu, nasosxana, dörd keçid məntəqəsi, iki tennis kortu, voleybol, basketbol və yüngül atletika meydançaları var.
Əsas korpus isə 600 nəfərlik akt zalı, üzgüçülük hovuzu, iki idman zalı, soyunub-geyinmə otaqları, 110 yerlik auditoriya zalı, 300 yerlik yeməkxana, tədris auditoriyaları, inzibati və xidmət otaqlar, müasir tədris laboratoriyaları, kitabxana və üzmə hovuzu olan uşaq bağçasından ibarətdir.
