Konstitusiya Məhkəməsi müxalif bloka rədd cavabı verdi
Aprelin 28-də Ermənistanın Konstitusiya Məhkəməsi müxalif Konqres-Xalq Partiyası blokunun 2 aprel parlament seçkisindən şikayəti ilə bağlı yekun qərar verib. Novator.az-ın məlumatına görə, iş üzrə əsas cavabdeh olan Mərkəzi Seçki Komissiyasının arqumentləri üstün gəlib və nəticələrin ləğvi ilə bağlı müraciət təmin edilməyib. Mərkəzi Seçki Komissiyası da Konqres-Xalq Partiyası blokunun nəticələrin ləğvi ilə bağlı müraciətinə rədd cavabı vermişdi.
Parlament seçkisində Konqres-Xalq Partiyası blokunun namizədləri siyahısına Erməni Milli Konqresinin lideri, sabiq prezident Levon Ter-Petrosyan başçılıq edib. Siyahıda ikinci Xalq Partiyasının lideri, deputat Stepan Dəmirçyanın adı olub. Qurum parlamentə düşə bilməyib.
Mərkəzi Seçki Komissiyası parlament seçkisinin nəticələrini aprelin 9-da təsdiqləyib. Prezident Serj Sərkisyanın sədrlik etdiyi hakim Respublika Partiyası 105 nəfərlik parlamentə 58 mandat qazanaraq təkbaşına hökumət qurmaq hüququ əldə edib.
İndiki hökumətdə Respublika Partiyasının ortağı olan Daşnaksütun Partiyası 7 mandat götürüb. Sarukyan bloku parlamentdə 31, “Çıxış” bloku 9 mandatla təmsil olunacaq.
