Azərbaycan Şimali Koreyanın qonşuluğunda
Mərkəzi qərargahı ABŞ-da olan “Freedom House” beynəlxalq hüquq müdafiə təşkilatı dünyanın 199 ölkəsi və ərazisini media azadlığı baxımından qiymətləndirib.
Novator.az-ın məlumatına görə, aprelin 28-də yayılan hesabatda qeyd olunur ki, dünya əhalisinin yalnız 13 faizi media azadlığı şəraitində yaşayır.
Media azadlığı reytinqinin tərtibatçıları qiymətləndirməni 0-100 bal arasında aparıblar. 0 bal ən azad media, 100 bal tam qeyri-azad media deməkdir.
Azərbaycan 90 balla media azadlığının ən çox pozulduğu ölkə və ərazilər sırasında yer alıb. Bu cərgədə İran və Suriya (onlar da Azərbaycan qədər – 90 bal toplayıb), Ekvatorial Qvineya və Kuba (91 bal), Eritreya və Krım (94 bal), Özbəkistan (95 bal), Türkmənistan və Şimali Koreya (98 bal) qərarlaşıb.
Rusiya 83 bal, Türkiyə 76 bal, Ermənistan 63 balla qeyri-azad ölkələr siyahısındadır.
Region ölkələrindən yalnız Gürcüstan (50 bal) mediası qismən azad olan ölkələrin siyahısına düşüb.
Mediası azad ölkələrin siyahısında ön pillələrdə Norveç (8 bal), İsveç (11 bal), Finlandiya (12 bal), İslandiya (15 bal) durur (Media azadlığı xəritəsi).
