Yeni silah-sursat və hərbi texnika gətirilib
Azərbaycanla Rusiya arasında imzalanmış hərbi-texniki əməkdaşlıq müqaviləsinə əsasən ölkəyə silah-sursat və müxtəlif təyinatlı müasir hərbi texnikanın növbəti partiyası gətirilib. Müdafiə Nazirliyinin 26 aprel məlumatına görə, gəmilərlə Bakıya çatdırılan hərbi təyinatlı yeni məhsullar ekspertlərin iştirakı ilə təhvil alınıb hərbi hissələrə veriləcək.
Rəsmi xəbərdə qeyd olunur ki, silah-sursat və hərbi texnika ən qısa zamanda Silahlı Qüvvələrin bölmələrinin silahlanmasına daxil edilib döyüş tətbiqinə tam hazır vəziyyətə gətiriləcək. Yeni silah və hərbi texnikanın tətbiqi üzrə mütəxəssislərin hazırlığını rusiyalı təlimatçılar aparacaq.
Müdafiə Nazirliyi bildirir ki, istifadədə olan silah və texnikanın ən yeni texnologiyaların tətbiqi ilə mərhələlərlə modernizə edilməsi prosesi də davam etdirilir.
Novator.az xatırladır ki, Azərbaycanın 2017-ci il büdcəsində müdafiə sahəsinə 2 milyard 642,9 milyon manat ayırmaq nəzərdə tutulub.
